2009-cu il oktyabrın 27-də saat 12:00 - da M.Qorki adına Mərkəzi Səyyar Kitabxana Fondunda 2009-cu ilin Azərbaycanda “Uşaq İli” elan edilməsi ilə əlaqədar Bakı Şəhər Mədəniyyət və Turizm İdarəsi tərəfindən kitabxanalarda ən fəal oxucuların müəyyən olunması  məqsədilə keçirilən  “Kitabla dost ol, ən fəal oxucu ol! “ müsabiqəsi  qaliblərinin mükafatlandırılmasına həsr olunan tədbir reallaşacaq.

Tədbirdə Mədəniyyət və Turizm Nazirliyinin, Bakı Şəhər İcra Hakimiyyətinin, Bakı Şəhər Mədəniyyət və Turizm İdarəsinin nümayəndələri, yazıçı və şairlərdən İlyas Tapdıq, Natiq Rəsulzadə, Rəhman Əlizadə, Gülzar İbrahimova, professor Gülrux Əlibəyli, hərb tariximizin tədqiqatçısı, jurnalist Şəmistan Nəzirli və başqa görkəmli elm və sənət adamları iştirak edəcək. Tədbirdən öncə dünya, həmçının Azərbaycan ədəbiyyatı nümunələrinindən ibarət geniş sərginin nümayişi olacaq. Bakı şəhəri musiqi məktəbləri şagirdlərinin ifasında hazırlanmış musiqi çələngi tədbiri daha da maraqlı edəcək.  

Mərasimdə  müsabiqənin qalibləri fəxri fərman və hədiyyələrlərlə mükafatlandırılacaqlar.

Qeyd edək ki,bu müsabiqənin keçirilməsində başlıca məqsəd kitaba, mütaliəyə, kitabxanalara marağı artırmaq, uşaqların şəxsiyyət kimi formalaşmasında kitabın,kitabxanaların nə qədər əhəmiyyətli rol oynadığını bir daha diqqətə  çatdırmaqdır. Gələcəyimiz savadlı gənclərdən asılıdır. Bu işdə mütaliənin, kitabın rolu  əvəzedilməzdir.

N. Ələkbərova

Şüvəlanda 16-saylı internat məktəbdə “Dünyanı  verək uşaqlara”  adlı bayram şənliyi

Tədbirdə İnternat məktəbində təlim-tərbiyə alan uşaqlara yaradıcı kollektivlərin, məzhəkəçilərin çıxışları və müğənnilərin iştirakı ilə musiqi proqramı təqdim edildi. Uşaqlar qonaqlarla birgə əyləndilər və rəqs etdilər. Sonra  uşaqlara hədiyyə kitablar, sovqatlar paylandı. Tədbirdə Bakı şəhər Mədəniyyət və Turizm İdarəsinin əməkdaşları, Əzizbəyov rayon İcra Hakimiyyətinin nümayəndələri, həmçinin ziyalılar, müxtəlif elm və peşə sahəsində çalışan ictimaiyyət nümayəndələri də iştirak etdilər.
Tədbirə  kütləvi-informasiya vasitələrinin nümayəndələri də dəvət olunmuşdu.

Bakı şəhər Mədəniyyət və Turizm İdarəsinin təşəbbüsü ilə aprelin 28-də M.Qorki adına Mərkəzi Səyyar Kitabxana Fondunda dramaturq, Azərbaycan Yazıçılar Birliyinin üzvü, əməkdar incəsənət xadimi, prezident mükafatçısı Rəhman Əlizadənin yeni nəşr olunmuş “Komediyalar” adlı kitabının ikinci cildinin təqdimatı keçiriləcək.

Tədbirdə Bakı şəhər Mədəniyyət və Turizm İdarəsinin rəisi Əlikram Əliyev, Azərbaycan Respublikasının  xalq artistləri A. Bəşirqızı, Yaşar Nuri, Azər Paşa Nemətov, Mərahim Fərzəlibəyov,  əməkdar incəsənət xadimi, rejissor Vaqif İbrahimoğlu,  sənətşünaslıq elmləri doktoru, professor İlham Rəhimli, filologiya elmləri doktoru, professor Aydın Dadaşzadə, Pantomima Teatrının baş rejissoru, əməkdar incəsənət xadimi Bəxtiyar Xanızadə, teatrşünas, əməkdar mədəniyyət işçisi Atabala Hacıbabayev, ”Qobustan” jurnalının baş redaktoru, şair Ələkbər Salahzadə və başqa görkəmli sənət adamları iştirak edəcəklər.

Aprelin 29-da saat 19.00-da S. Vurğun adına Azərbaycan Dövlət Rus Dram Teatrında dramaturqun “Vicdansız” əsərinin premyerası  olacaq.  

Əlizadə Rəhman Balarza oğlu 1947-ci il dekabrın 19-da Bakı şəhərində Mərdəkan qəsəbəsində anadan olub.

Azərbaycan Dövlət İncəsənət İnstitutunu bitirib.

İlk komediyaları olan “Kəndimizin narları”, ”Dadaşbala əməliyyatı”, ”Hamam-hamam içində”, ”Doğmalar” Şəki, Sumqayıt, Gəncə Dövlət Dram teatrları səhnələrində tamaşaya qoyulmuşdur.

” Günah” pyesinə Akademik Milli Dram  Teatrında quruluş verilib.
Dramaturqların 1988-ci ildə Moskvada kecirilən “Zaman və Qəhrəman” müsabiqəsində “Sabah çoxdan başlanıb” pyesi üçüncü mükafata layiq görülmüş, Gənc Tamaşaçılar Teatrında tamaşaya qoyulmuşdur.

Müxtəlif illərdə qələmə aldığı “Dünyanın axırı”, ”Don Kixot Abşeronski, ”Bəxtimin kələyi”, ”Damdabaca”, ”Laləli Düzən”, ”Maymaq”, ”Ay dəli...”, ”Tıq-Tıq xanım”, “Əbləhlərin toyu” və digər komediyalar Dövlət Gənclər Teatrı, A.Şaiq adına Azərbaycan Dövlət Kukla Teatrı səhnələrində tamaşaya qoyulmuşdur.

1993-cü ildən 2006-cı ilədək Azərbaycan Dövlət Kukla Teatrında, sonra isə Dövlət Gənclər Teatrında baş rejissor işləmişdir. Hazırda R. Əlizadə  Bakı şəhər Mədəniyyət    və Turizm İdarəsi nəzdində Satira teatr- studiyasında rejissor, Kukla Teatrında isə baş   rejissor kimi fəaliyyət göstərir.

Seminarda Kitabxana Direktorları Şurasının sədri F.Bəkirzadə, Şura üzvləri, kitabxana rəhbərləri və işçiləri iştirak etdilər. Seminarın gündəliyinə qabaqcıl  kitabxanaların iş təcrübəsinin öyrənilməsi, yeni  metodların tətbiqi, oxuculara xidmətin daha yüksək səviyyəyə qaldırılması üçün hansı işlərin həyata keçirilməsinin zəruriliyi və kitabxanaçılara faydalı olan digər məsələlər daxil edilmişdi.

İlk olaraq kitabxana fondunun direktoru Nüşabə Ələkbərova  kitabxananın  tarixi və strukturu, şöbələrin  işi haqqında  məlumat verdi.  Sonra kitabxananın şöbə müdirləri A.İbrahimova, A.Həşimova, R.Əliyeva oxuculara göstərilən məlumat-biblioqrafiya xidməti, kitabişləmə və komplektləşdirmə işi, kitabxanada keçirilən kütləvi tədbirlər, oxucularla işin forma və metodları, kitabxananın  ucotu və hesabatı, sənədləşmə işinin aparılması haqda məlumat verdilər.   

Seminarda, həmçının, M.Qorki adına MSKF-də oxucuların istifadəsinə verilmiş İnformasiya mərkəzi haqqında danışıldı,  kitabxananın saytı və elektron kataloqu iştirakçılara nümayiş etdirildi.

Təcrübə mübadiləsi zamanı seminar iştirakçılarını maraqlandıran suallar ətrafında müzakirələr oldu.

Tədbirin sonunda Direktorlar Şurasının sədri F. Bəkirzadə seminar haqqında öz rəyini söyləyərək bu təşəbbüsün davam etdiriləcəyini və kitabxana işində daha yaxşı göstəricilərin qazanılmasında əhəmiyyətli rol oynayacağını bildirdi.

Seminarın diğər iştirakçıları da  təcrübə mübadiləsinin   onlara ğələcək işlərinin təşkilində, məşğul olduqları sahədə müsbət nəticələrin əldə edilməsində, yol verilən nöqsanların aradan qaldırılmasında faydalı olacağı fikrini ifadə etdilər.

Növbəti seminar aprel ayının sonunda M.Sabir adına Mərkəzi Şəhər  Kitabxanasında Bakı səhərinin Binəqədi və Yasamal rayonlarının  kitabxana işçiləri üçun keçiriləcəkdir.

Bakı şəhər MKS, kütləvi və uşaq kitabxanalarının Direktorlar Şurası Bakı şəhər Mədəniyyət  və Turizm İdarəsinin təşəbbüsü ilə yaradılmış və ictimai əsaslarla fəaliyyət göstərən təşkilati qurumdur. Direktorlar Şurası öz fəaliyyətini Mədəniyyət haqqında” və “Kitabxana işi haqqında” Azərbaycan Respublikası Qanunlarına müvafiq qurur.

Direktorlar Şurasının yaradılmasında əsas məqsəd kitabxana işi sahəsində dövlət tərəfindən qarşıya qoyulmuş vəzifələrin həyata keçirilməsində Bakı şəhər Mədəniyyət və Turizm İdarəsinə və şəhər kitabxana işçilərinə əməli köməklik göstərilməsindən ibarətdir.

Direktorlar Şurası kitabxana rəhbərlərinə və işçilərinə hərtərəfli metodiki köməklik göstərir, tarixi, əlamətdar günlər, görkəmli şəxslərin yubileyləri ilə bağlı təqvim planları və tövsiyələrin hazırlanması, müntəzəm olaraq ayrı-ayrı kitabxanaların işinin öyrənilməsi və şuranın müzakiəsinə çıxarılması, kitabxanaların işi ilə bağlı meydana çıxan problemləri təhlil edərək onların həlli ilə əlaqədar Bakı şəhər Mədəniyyət  və Turizm İdarəsi qarşısında vəsadət qaldırılması, kitabxanaların fondlarına baxış keçirilməsi, köhnəlmiş və əhəmiyyətini itirmiş ədəbiyyatın fonddan silinməsi haqqında məsləhətlərin verilməsi, kitabxanaların saxlanması üçün maddi-texniki vəziyyətin öyrənilməsi, çatışmayan lazımi avadanlıqlar haqqında rəhbərliyə məlumat verilməsi kimi məsələlərlə məşğul olur.

Kitabxana işçilərinə metodiki kömək göstərmək məqsədilə 2009-cu ildə qabaqcıl kitabxanalarda seminarların keçirilməsi qərara alınmışdır. İl ərzində təşkil ediləcək bu seminarların Bakı şəhərinin bütün rayonlarındakı kitabxanaları əhatə etməklə davamlı şəkildə həyata keçirilməsi nəzərdə tutulur.

İlk seminar aprel ayında Bakı şəhəri Qaradağ və Səbail rayonlarının kitabxanalarına metodiki kömək məqsədilə M.Qorki adına MSKF-də keçiriləcəkdir.

Seminarda kitabxanaların iş təcrübəsi öyrəniləcək, yeni iş metodlarının yayılması, sənədləşmə işinin düzğün aparılması və kitabxanaçıları maraqlandıran diğər məsələlər müzakirə olunacaq, kitabxanaçılara  məsləhətlər veriləcəkdir.

“Bakı-İslam Mədəniyyəti Paytaxtı – 2009” və Uşaq ili elan edilməsi ilə əlaqədar Direktorlar Şurası üzvlərinin rəhbərlik etdikləri şəhər kitabxanalarının birgə iştirakı ilə tədbirlər planı da  işlənib hazırlamışdır.

Fevralın 6-da  M. Qorki adına Mərkəzi Səyyar Kitabxana Fondunda Bakı şəhər Mədəniyyət və Turizm İdarəsinin təşəbbüsü və dəstəyi, M.F.Axundov adına Azərbaycan Milli Kitabxanasının yaxından köməkliyi ilə yaradılmış informasiya mərkəzinin açılışı oldu.